من النهاردة مفيش كسل فيه برنامج مختصر للعناية بنفسك

[b]

النهاردة باذن الله موضوع اهداء مني لكل واحدة مكسلة
او كل واحدة بتكسل تاخد بالها من نفسها
يعني بتزهق من الخطوات الكتير والمنتجات الكتير المطلوبة للعناية ببشرتها وجسمها فبتفضل انها تكسل وتكبر مخها
وومكن برضه تبقي معندهاش وقت بتتشغل ووراها اولاد وشغل بيت و عيال واما بتدرس في الكلية وليل نهار محاضرات وسكاشن و امتحانات لما شددت شعرها.

بس في وسط كل ده اوعي تنسي انك انثي يعني لازم تبقي عنوان للجمال والاهتمام بالنفس (اكيد طبعا ياحلوين للزوج وبس مش لاي حد وانا بريئة من اي واحد هتطبق الكلام ده لغير الزوج)

فعاوزة اقول لكم متخافوش انا ما نسياكم ياقمرات النهاردة باذن الله خليكوا معاي هتطلعوا مبسوطين ان شاء الله

بسم الله نبدا

اولا:
اشتري ياستي الحاجات الاتية وجهزيها:

1- صابونة دوف الاصليه لو سمحتي (ولو عاوزة غسول بشرة مناسب لنوع بشرتك يبقي خير وبركة).

2- اي اسكراب بشرة من شركة محترمة. وهرشح لك اتنين (فيه كلين اند كلير غسول يومي مقشر للوجه ده حلو جدا انا جربته بنفسي - اسكراب كلير اسكن من ايفون بس ده لاينصح بيه للبشرة الحساسة او اللي فيها حبوب او التهابات لانه حامي شوية عالبشرة)

3- كريم مرطب مناسب لنوع بشرتك من ماركة طبعا معروفة وموثوق بها. (مش هرشح لك حاجة انتي ونوع بشرتك وطبعا ميزانيتك بس انا بفضل نيفيا الازرق الاصلي ).

4- واقي للشمس مناسب وماركة كويسة من مكان موثوق به.
(ممكن تجيبي كريم نهاري بمعامل واقي من الشمس وكده تبقي ضربتي عصفورين بحجر ورحتي نفسك من خطوة)

5- كريم جليسوليد الاحمر.

6- كريم كارباميد من الصيدليه.
بعد الاستئذان من صاحبة الصورة طبعا

7- كريم او سيرم ولو سمحتي لازم يبقي ماركة كويسة ومن مكان موثوق منه للعناية بالمنطقة حوالين العين.

8- زيت جونسون للاطفال اي ريحة حسب اللي تحبيه.

9- شاور جل محترم علي ذوقك كده.

10- اسكراب للجسم اي نوع وممكن يبقي ملح حليب و زيت زيتون تخلطي معلقتين ملح حليب ومعلقة زيت زيتون وتقلبي كويس يبقي احلي اسكراب جسم.

10-ليفة محترمة وبنت ناس كويسين.

11- حجر او مبرد رجلين.

12- ميه ورد من الصيدليه مش من العطار (وبلاش ميه ورد لاصحاب البشرة الدهنية وسهلة التحسس واستبدليها بتونر مناسب لنوع بشرتك)

13- زيت ورد اصلي وبكرر وبقول اصلي ماركة اما اصالة او الكابتن من السوبر ماركت مش من العطار لو سمحتي.

14- غسول مناسب للمناطق الحساسة وياريت يبقي حاجة حلوة كده ومن صيدليه محترمة ( افضل حاجة في السوق حسب كلام الدكتور هي سيتيال).

15- كبسولات فيتامين ايه من الصيدليه.

16- بلسم شفايف او زبده كاكاو

تمام يالا بينا نبدا

1- الصبح تصحي تغسلي وش سيادتك بصابونة دوف او الغسول اليومي بتاعك وتنشفيه كويس وهوب نقطتين من ميه الورد عليه وسيبيه ينشف و روحي جري فطري العيال او روحي افطري انتي.

2- خلاص هننزل الشغل او الكلية ندهن الكريم النهاري او واقي الشمس وايدنا ندهنا كريم جليسوليد وندعكه حلو لحد ما يختفي وعلي الشفايف بلسم الشفايف
وكمان خدي كريمك النهاري او واقي الشمس وكمان كريم جليسوليد بتاعك معاكي ويالا بقي ومع السلامة ماتتاخريش بره واقفلي الباب وراكي.

3- في الشغل او الكلية
لو دخلتي تتوضي للصلاة اتوضي عادي خالص وبعدين ادهني واقي الشمس او كريم النهار تاني علي وشك اوعي تنسيه وايدك كريم الجليسوليد برضه واتوكلي علي الله.

4- رجعنا البيت بعد يوم ممل
حمد الله علي سلامتك
علي الحمام عدل اغسلي وشك بصابونة دوف زي الشطورة كده وياريتك لو تستعملي الاسكراب احسن من الغسول العادي او الصابونه عشان تنضفي وشك مع العادم والتلوث وكل حاجة من اثار الخروج.
اطلعي من الحمام شوية ميه ورد في كف ايدك ورطبي وشك بالكريم المرطب واقعدي كلي لك لقمة وادعي لمامتك او اطبخي للعيال وابوهم.
بعد كل وضوء رطبي وشك وامسحي بميه الورد ياقمر ما تنسيش برضه.
وفي المطبخ خلي علبة كريم جليسوليد او حتي قشرة الليمونة الفاضية قدامك اشتغلي واغسلي الاطباق واديها دعك في ايدك اما بالليمونة المسكينة او بالكريم عشان ايدك تبقي ايد انثي حتي مع الاعمال الشاقة.

5- قبل النوم
يالا اغسلي وشك بالغسول او الصابونة
افتحي كابسولة فيتامين اي وغرقي بيها وشك وشفايفك
وادهني السيرم او الكريم حوالين العنين
وادعكي المنطقة الحساسة خارجيا بزيت الورد عشان يفتح ويخلي الريحة حلوة ويدي نضارة للمنطقة ديه (ان شاء الله هنزل لها موضوع مستقل بس هيبقي للرايقات وبس)
ورجليك غرقيهم كارباميد ومش ضروري تلبسي شراب
وايديكي كريم جليسوليد.
وتصبحي علي خير.

6- لما تيجي تاخدي الشاور بتاعك.
ياريت لو علي الاقل مرتين اسبوعيا صيف شتاء الشاور ملوش علاقة انتي مشغولة والا مش مشغولة
بالنسبة لشعرك(هنعمل موضوع ان شاء الله بس هيكون في قسم الشعر مش هنا)
هتبلي جمسك عادي وياريت لو طبعا ميه سخنة
هتجيبي ليفتك الحلوة بنت الناس وحطي عليها الاسكراب وادعكي كويس قوي عشان تشيلي الجلد الميت
وبعدين الشاور واديها دعك
واوعي تنسي تستعملي غسول المناطق الحساسة خارجيا
والمبرد وادعكي رجلك في السريع كده
وفي الاخر قبل ما تخرجي نشفي كويس و رطبي بزيت جونسون للاطفال ميزته انه سريع الامتصاص جدا يادوب تدهني دراع تلاقي اللي قبله نشف
يعني هتخلصي دهان منه هتلاقي نفسك جاهزة تلبسي مش هتنتظري الجلد يشربه زي اللوشن.

وبس كده ايه رايك في نفسك بقي مش زي القمر وباقل الخطوات؟
مش عاوزة واحدة تقولي الخطوات كتير بقي كده المختصر المزيد.

يالا ادعي لي اوعي تنسي
[/b]